Guðmundur Benediktsson, Gummi Ben, var í gær gestur hjá Hjörvari Hafliðasyni í hlaðvarpsþættinum Dr.Football. Þar tjáði hann sig meðal annars um það hvernig það er að þjálfa Gary Martin.
Gary hefur verið mikið í umræðunni í vikunni eftir að hafa verið rekinn frá ÍBV. Brottrekstur hans kom í kjölfar þess að hann tók upp myndband af nöktum liðsfélaga sínum í búningsklefa liðsins án samþykkis leikmannsins. Gary hefur nú samið við Selfoss.
,,Það er mjög krefjandi, það er einhver ástæða fyrir því að Gary Martin á erfitt með að haldast einhvers staðar,“ sagði Guðmundur er hann var spurður út í hvernig það er að þjálfa Gary. Hann var aðstoðarþjálfari hjá KR þegar leikmaðurinn spilaði þar.
Guðmundur talaði þá einnig um að Rúnar Kristinsson, þjálfari KR, hafi getað ráðið við hann. ,,Rúnar virtist hafa eitthvað tak á Gary Martin sem gekk upp.“
Hjörvar spurði Guðmund svo nánar út í það af hverju það er krefjandi að þjálfa Gary.
,,Ég held að þú þurfir að henda býsna mörgum prinsippum, þjálfaraprinsippum hjá þér, út um gluggan til þess að sætta þig við hvernig Gary Martin er sem leikmaður og þess háttar. Ég held að það sé óþarfi að ég fari eitthvað nánar út í það.“
Eins og segir hér ofar þá hefur Gary samið við Selfoss og mun taka slaginn með þeim í Lengjudeildinni í sumar.
