Real Madrid tók á móti Chelsea í fyrri leik liðanna í undanúrslitum Meistaradeildar Evrópu í kvöld. Leikurinn endaði með 1-1 jafntefli liðanna.

Chelsea byrjaði leikinn af krafti og átti Timo Werner dauðafæri sem hann klúðraði strax í byrjun leiks. Pulisic braut ísinn fyrir gestina þegar stundarfjórðungur var liðinn af leiknum með flottu marki eftir sendingu frá Rudiger. Eftir markið héldu gestirnir áfram að sækja en það var Benzema sem jafnaði metin eftir hálftíma leik þvert gegn gangi leiksins.

Seinni hálfleikur var ekki jafn fjörugur og sá fyrri. Liðin voru bæði mjög skipulögð til baka og var ljóst að þjálfarar liðanna vildu ekki eins opinn leik og í fyrri hálfleik. Bæði lið áttu ágætis tilraunir en ekki voru fleiri mörk skoruð og 1-1 jafntefli því niðurstaðan í kvöld.

Liðin mætast aftur á miðvikudaginn í næstu viku á Stamford Bridge og þá kemur í ljós hvort liðið tryggir sér farseðilinn í úrslitaleik Meistaradeildar Evrópu.

Real Madrid 1 – 1 Chelsea
0-1 Pulisic (´15)
1-1 Benzema (´29)