Jude Bellingham, 17 ára miðjumaður Borussia Dortmund, er á óskalista Chelsea fyrir sumarið. Þó nokkrir erlendir miðlar skrifa um hugsanleg skipti leikmannsins.

Bellingham hefur verið frábær fyrir Dortmund upp á síðkastið. Hann skoraði til að mynda gegn Manchester City í Meistaradeild Evrópu í vikunni. Þá hefur hann nú þegar leikið tvo A-landsleiki fyrir England, þrátt fyrir ungan aldur.

Chelsea er talið ætla að bjóða Dortmund 100 milljónir punda fyrir leikmanninn. Jafnframt gæti áhugi liðsins á Bellingham þýtt að það muni ekki reyna að fá Declan Rice, miðjumann West Ham. Sá síðarnefndi hefur reglulega verið orðaður við bláliða í töluverðan tíma.

Liverpool ku einnig fylgjast með gangi mála hjá Bellingham. Áhugi Chelsea er þó talinn vera meiri.

Dortmund keypti Bellingham frá Birmingham á 25 milljónir punda í fyrra. Líklegt er að þeir muni gera allt í sínu valdi til að halda leikmanninum hjá sér. Það gæti þó verið erfitt fyrir liðið að hafna himinnháu tilboði.