Helena Jónsdóttir, verkefnisstjóri á Flateyri hefur sagt upp störfum og hættir 31. maí næstkomandi samkvæmt frétt bb.is. Var Helena ráðin um mitt síðasta ár til þriggja ára. Hún hefur ekki viljað tjá sig um ástæðu uppsagnarinnar samkvæmt frétt Bæjarins Bestu, fréttavef vestfirðinga.
Var starf verkefnastjóra á Flateyri því auglýst aftur rétt fyrir páska og rann umsóknar frestur út 8. apríl síðastliðin án þess að nokkur umsókn bærist. Var fresturinn því framlengdur til 22. Apríl.
Athygli vekur að enginn hafi sótt um starfið en Flateyri hefur notið mikilla vinsælda síðustu ár og er töluverð uppbygging í bænum meðal annars í tengslum við Lýðháskóla sem stofnaður var þar árið 2018 en Helena Jónsdóttir fráfarandi verkefnisstjóri var framkvæmdastjóri við stofnun skólans og skólastjóri á fyrsta starfsári hans.
„Kannski var þetta ekki nægilega vel kynnt við erum að birta auglýsinguna aftur og meira núna,“ segir Tinna Ólafsdóttir upplýsingafulltrúi Ísafjarðar. Hún segir 14 umsóknir hafa borist þegar auglýst var í starfið um mitt síðasta ár og valið hafi verið úr hópi frambærilegra umsækjenda.
Starf verkefnisstjóra á Flateyri var sett á fót eftir snjóflóðin í janúar á síðasta ári og er hlutverk verkefnastjóra er að leiða nýsköpunar- og þróunarverkefni á Flateyri, í samstarfi við verkefnisstjórn á grundvelli samnings milli samgöngu- og sveitarstjórnarráðuneytis, Ísafjarðarbæjar og Vestfjarðarstofu. Sjá nánar hér.
Gerð er sú krafa að verkefnastjórinn hafi aðsetur á Flateyri en bærinn hefur verið vinsæll meðal listafólks að sunnan sem hefur keypt sér hús það síðustu ár. Má þá helst nefna stíltvennuna Kormák Geirharðsson og Skjöld Sigurjónsson, Áslaugu Guðrúnardóttur kynningar- og markaðsstjóri Listasafns Reykjavíkur og Runólfur Ágústsson lögfræðingur og frumkvöðull og kvikmyndagerðarmanninn Sindra Kjartansson. Rithöfundurinn Huldar Breiðfjörð hefur einnig keypt fasteign á Flateyri sem og handboltaþjálfarinn Dagur Sigurðsson. Júlíus Þorfinnsson forstjóri Stoða keypti Tankinn, skemmtilegt mannvirki sem stendur við bæjarmörkin ásamt eiginkonu sinni Þórunni Ásdísi Óskarsdóttur hönnuði og Karli Hjálmarssyni.
