Leikmenn Manchester City eru ekki útsofnir fyrir leikinn gegn Borussia Dortmund í Meistaradeild Evrópu í kvöld. Ástæðan er sú að í þrígang var flugeldasýning fyrir utan hótel liðsins í Þýskalandi í nótt.

17 karlmenn mættu að hóteli liðsins klukkan 02:45 í nótt og hófu að kveikja á flugeldum, öryggisverðir City fóru á vettvang og náðu að fæla mennina burt.

Gæslan hjá City taldi að þetta væri aðeins eitt atvik en þeir vöknuðu aftur upp við vondan draum klukkan 04:30 þegar næsta flugeldasýning fór í gang, þá höfðu sjö menn snúið aftur.

Mennirnir mættu svo aftur klukkutíma síðar og kveiktu aftur á flugeldum. City vann fyrri leikinn 2-1 á heimavelli og er því með góða stöðu en Dortmund er með útivallarmarkið sem getur gefið.

„Þetta voru ótrúleg læti, þetta var ekki bara ein sprengja heldur sýning,“ sagði heimildarmaður Daily Mail. „Lætin voru svo mikil að það væri eins og hótelið væri að hristast.“