Tveir leikir fóru fram í 8-liða úrslitum Meistaradeildar Evrópu í kvöld. Chelsea komst áfram í undanúrslit eftir samanlagðan sigur gegn Porto

Á Ramón Sanchez Pizjuan vellinum í Sevilla á Spáni, mættust Chelsea og Porto. Fyrri leikur liðanna fór fram á sama velli og þá var Porto heimaliðið. Sá leikur endaði með 2-0 sigri Chelsea.

Leikur kvöldsins endaði með 1-0 sigri Porto. Eina mark leiksins skoraði Mehdi Taremi í uppbótartíma venjulegs leiktíma. Chelsea er samt sem áður komið áfram í undanúrslit með samanlögðum 2-1 sigri úr einvíginu.

Markið sem Taremi skoraði var einkar glæsilegt. Nanu, liðsfélagi hans hjá Porto, átti fyrirgjöf af hægri kanti. Fyrirgjöfin rataði á Taremi sem smurði boltann upp í markvinkilinn með glæsilegri hjólhestaspyrnu.