Marita-fræðslan dregur nafn sitt af norsku stúlkunni Marita sem lést af völdum eiturlyfja 23 ára að aldri. Árum saman hefur Marita-fræðslan veitt forvarnarfræðslu í formi fyrirlestra í skólum en undanfarin ár hefur starfsemin víkkað mikið út og orðið fjölbreyttari. Meðal nýjunga seinni árin eru til dæmis eineltisfræðsla og forvarnarfræðsla fyrir börn undir unglingsaldri.

Sp: Í huga almennings stendur Marita-fræðslan fyrst og fremst fyrir vorvörnum gegn áfengis- og vímefnaneyslu unglinga. Er það rétt mynd af félaginu?

„Já, það er að vissu leyti rétt. Þarna hefur starfið átt rætur sínar alveg frá upphafi er Marita-fræðslan var stofnuð árið 1998. Hins vegar tók ég þá afstöðu árið 2007 að færa starfið niður á miðstigið, það er í aldurshópinn 10 til 12 ára, og þá með öðru formi, það er kallað jákvæðar forvarnir. Þá er meira verið að fjalla um lífsstílinn, um að velja rétt, og hvað sé hægt að gera ef maður lendir í þessum eða hinum kringumstæðum. Þetta eru annars konar forvarnir en þær þegar verið er að sýna afleiðingar neyslu sem víti til varnaðar – hér er verið að sýna einstaklinga sem völdu rétt,“ segir Magnús Stefánsson, framkvæmdastjóri Marita-fræðslunnar, en hann segir þessa gerð forvarna geysilega mikilvæga:

„Þetta eru forvarnir af fyrstu gerð þar sem markmiðið er að byggja upp einstakling sem segir „nei, ég ætla ekki að nota þetta“, eða „ég ætla að bíða“. Við leggjum mikla áherslu á lífsstílinn sjálfan, næringu, hreyfingu og allt þetta. Síðan þyngist ár frá ári áherslan á tölvunotkun og hættur hennar, en við fræðum krakkana um mögulegar afleiðingar kæruleysislegrar hegðunar á netinu. Til dæmis samskipti við ókunnuga.“

Mynd: Ruth Ásgeirsdóttir/Ljósmyndir og list

Marita-fræðslan býður einnig upp á eineltisfræðslu:

„Við hönnuðum saman, ég og Páll Óskar, fyrirlestur um eineltismál. Páll Óskar er reyndar hættur vegna mikilla anna en í hans stað er komin Anna Steinsen, sem er þekktur Dale Carnegie-fyrirlesari. Við leggjum mikla áherslu á umræður eftir eineltisfyrirlestrana því það er mikilvægt að þátttakendur viðri sína upplifun,“ segir Magnús.

SP: En hvernig er þessi starfsemi fjármögnuð og hvernig gengur að halda þessu gangandi fjárhagslega?

„Skólarnir greiða fyrir hvern fyrirlestur en það dugar hvernig nærri til. Bindindissamtökin IOGT hafa stutt dyggilega við bakið á þessu starfi sem og önnur fyrirtæki. Við erum mjög þakklát fyrir þann stuðning sem við gætum ekki verið án, en óneitanlega er þetta barningur,“ segir Magnús en það er ljóst að Marita-fræðslan er starfsemi sem rekin af hugsjón þrátt fyrir mikla fagmennsku í starfinu.

Nánari upplýsingar um Marita-fræðsluna og skráningu í fræðslu er að finna á vef félagsins og í síma 519-2424.