Íslenska kvennalandsliðið mætti Ítalíu í vinnáttuleik í Flórens í dag. Leikurinn var sá fyrsti undir stjórn Þorsteins Halldórssonar. Ítalía vann á endanum 1-0 sigur eftir fremur jafnan leik.
Það var jafnræði yfir leiknum í byrjun. Hvorugt liðið skapaði hættulegt færi fyrr en seint í fyrri hálfleik þegar Annamaria Serturini slapp inn fyrir vörn Íslands og setti boltann í slánna. Hún ætlaði að vippa boltanum yfir Cecilíu Rán Rúnarsdóttur, sem var að spila sinn annan landsleik fyrir Ísland, en setti boltann aðeins of hátt. Í kjölfarið áttu þær ítölsku góðan kafla en náðu ekki að skora fyrir leikhlé. Staðan 0-0 eftir fyrri 45.
Snemma í seinni hálfleik vildi Elín Metta Jensen fá víti er hún féll innan teigs, ekkert dæmt samt. Stuttu komst Ísland í ágætis færi eftir vel tekna hornspyrnu Alexöndru Jóhannsdóttur en markvörður Ítala gerði vel í að koma boltanum aftur fyrir markið.
Eftir tæpan klukkutíma leik þurfti Cecilía að hafa sig alla við til að verja frá Glionna í liði Ítalíu eftir að sú síðarnefnda hafði sloppið í gegn. Um 10 mínútum síðar kom hún Íslandi aftur til bjargar þegar hún kom vel út á móti Beatrice Merlo sem hafði sloppið inn fyrir vörn Íslands.
Á 72. mínútu komust þær ítölsku þó yfir. Arianna Caruso hafði þá betur gegn Guðrúnu Arnardóttur í teig Íslands áður en hún lék svo á Cecilíu og skoraði.
Ísland fékk tækifæri til að jafna stuttu síðar þegar Karitas Tómasdóttir fékk gott skallafæri. Durante gerði þó vel og varði. Það hefði verið gaman fyrir Karitas að skora í sínum fyrsta landsleik.
Síðasta færi Íslands til að jafna fékk svo Sveindís Jane Jónsdóttir en hún skaut þá yfir. Lokatölur 1-0 fyrir Ítalíu.
Byrjunarlið Íslands
Cecilía Rán Rúnarsdóttir; Elísa Viðarsdóttir, Glódís Perla Viggósdóttir, Guðrún Arnardóttir, Áslaug Munda Gunnlaugsdóttir; Gunnhildur Yrsa Jónsdóttir, Alexandra Jóhannsdóttir, Karólína Lea Vilhjálmsdóttir; Hlín Eiríksdóttir, Elín Metta Jensen, Agla María Albertsdóttir.
