Nokkrir Íslendingar hafa komið við sögu í Evrópuboltanum það sem af er degi. Hér er samantekt á því helsta sem hefur gerst:

Elías Rafn Ólafsson stóð í marki Fredericia sem tapaði 4-1 gegn Viborg í efri hluta næstefstu deildar í Danmörku. Þar er keppt um að komast upp í efstu deild. Lið Ólafs Kristjánssonar, Esbjerg, gerði þá 1-1 jafntefli við Patrik Gunnarsson, Stefán Teit Þórðarsson og félaga í Silkeborg í sömu keppni.

Silkeborg er í öðru sæti efri hlutans með 53 stig, aðeins stigi á undan Esbjerg. Efstu tvö sætin veita þátttökurétt í efstu deild. Fredericia er í fimmta sæti, 21 stigi frá Silkeborg. Átta umferðir eru eftir.

Jón Daði Böðvarsson kom inn á á 78.mínútu í 0-3 tapi Millwall gegn Swansea á heimavelli. Millwall er í níunda sæti, 8 stigum frá umspilssæti.

Birkir Bjarnason spilaði allan leikinn og lagði upp mark Brescia í 1-1 jafntefli gegn Pescara í Serie B. Hólmbert Aron Friðjónsson sat allan tímann á varamannabekk Brescia. Lið þeirra er nú með 44 stig, stigi á eftir umspilssæti. Chievo, sem er í síðasta umpsspilssætinu, á þó tvo leiki til góða á Brescia.