Sergio Ramos tilkynnti sjálfur á Instagram í dag að hann væri að kljást við vandamál í vinstri kálfa eftir að hafa spilað aðeins nokkrar mínútur með Spáni gegn Kosovo í gærkvöldi. Marca segir að Ramos verði frá í um það bil mánuð sem þýðir að hann missir bæði af 8-liða úrslitum við Liverpool í Meistaradeildinni og El Clásico gegn Barcelona.

„Sannleikurinn er sá að undanfarnar vikur hafa verið ansi erfiðar. Sem betur fer hefur mér liðið aðeins betur undanfarna daga en stundum er maður bara óheppinn.“

„Eftir leikinn í gær sá ég að eitthvað var að í kálfanum mínum. Nú hef ég verið skoðaður og staðfest að ég er með vöðvameiðsli í kálfa. Það særir mig að geta ekki hjálpað liðinu í komandi leikjum sem eru gríðarlega mikilvægir,“ sagði Sergio Ramos í færslu á Instagram.

Real Madrid hefur ekki gengið vel í Meistaradeildinni án fyrirliðans og hafa tapað 7 af síðustu 10 leikjum sem hann tók ekki þátt í. Þá voru margir spenntir að sjá Ramos kljást við Salah aftur en frægt er þegar Salah þurfti að fara af velli vegna meiðsla í úrslitaleik Meistaradeildarinnar 2018 eftir baráttu við Ramos.

Einnig mætast stórliðin Real Madrid og Barcelona í spænsku deildinni 10. apríl en það munar aðeins tveimur stigum á liðunum.