Davíð Snorri, landsliðsþjálfari u-21 árs landsliðs Íslands mætti til blaðamannafundar eftir 2-0 tap Íslands gegn Danmörku á EM u-21 árs landsliða í dag. Davíð er svekktur með úrslitin en ánægður með frammistöðu sinna manna.

„Ég er mjög stoltur af mínu liði. Við áttum að skora mark og galopna leikinn. Það var ákvörðun hjá okkur fyrir leik að leggja áherslu á nokkur atriði sem við vildum laga og við gerðum það heilt yfir í dag.“

Íslenska liðið fékk mark á sig snemma leiks en Davíð er ánægður með hvernig liðið brást við.

„Þetta var erfið byrjun, við vinnum okkur aftur út úr því en. Við fengum móment til að snúa leiknum betur okkur í vil og áttum að skora á Danina í dag. Ég er stoltur af mínu liði fyrst og fremst þótt við séum að sjálfsögðu svekktir með úrslitin. Við skyldum allt eftir á þessum velli.“

Davíð segist klárlega sjá hluti úr leiknum í dag sem voru gerðir betur en í tapinu á móti Rússlandi.

„Það var hluti af þessum Rússa-leik sem var ágætlega gerður og við töluðum um það. Í dag sá ég batamerki hjá okkur í litlum atriðum.“

„Við fórum einbeittari í leikstöðuna 1 á móti 1, það var styttra á milli manna til að taka hjálparvörn. Þegar við sóttum þá fórum við saman upp og þegar að við vörðumst vorum við saman niðri. Í dag gerðum við fleiri hluti saman sem lið.“ sagði Davíð Snorri, landsliðsþjálfari u-21 árs landsliðsins.

Næsti leikur Íslands er þann 31. mars gegn Frakklandi, það er síðasti leikur liðsins í riðlinum. Möguleikar Íslands á að komast áfram úr riðlinum eru litlir, liðið situr í neðsta sæti, stigalaust.