Angjelin Sterkaj, 35 ára gamall albanskur maður sem játað hefur morðið á Albananum Armando Bequirai í Rauðagerði, komst í fréttir þann 3. september árið 2020, er hann var bendlaður við hópslagsmál í miðborg Reykjavíkur.

Suðuramerískur maður, búsettur hér til 14 ára, sagðist þá hafa verið þolandi í hrottalegri hópárás sem hafi verið knúin kynþáttahatri. Gerendur í málinu voru sagðir vera Albanar.

Einn þeirra var umræddur Angelin Sterkaj, sem steig fram í viðtali við Fréttablaðið. Þar neitaði hann því að hann og albanskir félagar hans hefðu átt upptökin að slagsmálunum. Í fréttinni segir hann að hinir meintu þolendur hans hefðu mætt á vettvang vopnaðir hnífum og járnkylfum og þeir hefðu ráðist á hann og félaga hans.

Þá segir enn fremur í fréttinni:

„Hann segir að átök milli hópanna tveggja eiga sér langa að­draganda en öll deilu­mál hafi verið leyst fyrir ári síðan. Um síðustu helgi gengu hins vegar tveir aðilar úr hinum hópnum upp að albönskum dyra­verði sem vinnur á Kofanum, slógu hann og sögðu við hann „að hann myndi deyja í kvöld.“

„Eftir það hringir hann í vini sína, vinir hans mæta og hann segir þeim hvað gerðist. Við fórum þangað fimm saman til að ræða við þá sem réðust á hann. Þegar við mætum tökum við fljót­lega eftir því að þeir voru 10 saman og þeir réðust á okkur,“ segir Angjelin.

„Þetta var allt planað, það voru þeir sem voru með hnífa og svo voru ein­hverjar stelpur þarna með pipar­úða,“ segir Angelo og í­trekar að það stóð aldrei til að þeirra hálfu að ráðast á þá. Hann fékk sjálfur pipar­úða í augun og segir það svíða enn.“

Á íslenskan son

Angjelin vísaði jafnframt ásökunum um kynþáttafordóma til föðurhúsanna. Í viðtalinu kom fram að Angjelin á íslenskan son. Í frétt DV í gær kom fram að hann hefur verið í sambúð með konu hér á landi og var um tíma búsettur í miðbænum. Hann sagði í áðurnefndu viðtali við Fréttablaðið:

„Það halda allir að allir Albanar sem eru hér á landi eru bara til vand­ræða. En ég ber virðingu fyrir öllum á þessum landi. Ég á vini frá fjöl­mörgum þjóð­ernum og fullt af ís­lenskum vinum. Ég er hálf ís­lenskur. Hálf fjöl­skyldan mín er ís­lensk og sonur minn er ís­lenskur.“

Sjá einnig: Nafn mannsins sem grunaður er um morðið í Rauðagerði

Virðist vera eftirlýstur í Albaníu

DV hefur fundið gögn sem virðast benda eindregið til þess að Angjelin hafi verið eftirlýstur í Albaníu á síðasta ári og eigi þar óafplánaðan dóm fyrir ofbeldisfullt rán.

Gögnin má sjá hér