Sveinn Aron Guðjohnsen var á skotskónum þegar U21 árs landslið Íslands tapaði gegn Rússlandi í fyrsta leik Evrópumótsins í gær. Framherjinn knái hefur átt frábæru gengi að fagna með U21 árs liðinu undanfarna mánuði.

Sveinn var stoltur af því að spila sinn fyrsta leik á stórmóti, þó illa hefði farið. „Það var bara geggjuð tilfinning, við erum stoltir af því að vera hérna og vera valdir í hópinn. Ég hafði ekki áhyggjur fram að fyrsta markinu, við vorum með stjórn á varnarleiknum. Það hafa allir leikir verið þannig að hitt liðið er mikið með boltann,“ sagði Sveinn en Rússar unnu að lokum 4-1 sigur.

Sveinn fékk spurningu frá Sæbirni Steinke blaðamanni Fótbolta.net á fundinum, um hvort hann væri að missa hárið og hvort hann yrði á undan föður sínum, Eiði Smára Guðjohnsen að raka hárið af.

„Ég verð örugglega á undan honum að snoða mig, hann (Eiður Smári) er svo þrjóskur,“ sagði Sveinn og brosti á fundinum.

Sveinn var fljótur að kveikja á perunni enda hafði fyrirliði U21 árs liðsins, beðið Sæbjörn um að spyrja að þessari spurningu. „Hvað er þetta svona slæmt? Var Jón Dagur að senda þér þetta?,“ sagði Sveinn og Sveinbjörn játaði því.

„Þú getur sagt honum það að hann sé líka að missa hárið,“ sagði Sveinn og brosti.