Viðtal við Katrínu Jakobsdóttur, forsætisráðherra, í útvarpsþættinum Harmageddon fyrir hádegi í dag hefur vakið gríðarlega athygli, en líkt og DV hefur fjallað um þá spurði annar þáttastjórnenda, Frosti Logason, Katrínu eldfimrar spurningar um Svandísi Svavarsdóttur, heilbrigðisráðherra.
„Er heilbrigðisráðherra raunverulega í stakk búinn til að valda þessu verkefni?“
Hann bætti síðan við að Svandís hefði átt í erfiðleikum í sínu persónulega lífi og gaf í skyn að það hefði mikil áhrif á hennar störf en ætla má að hann sé að vísa í erfið veikindi dóttur Svandísar sem greindist með heilaæxli seint á síðasta ári. Þá lést faðir Svandísar, Svavar Gestsson, fyrrum ráðherra og sendiherra, á þessu ári.
Svar Katrínar var eftirfarandi:
„Ert þú að spyrja mig í alvöru hvort heilbrigðisráðherra geti valdið starfinu sínu? Við gætum ekki haft betri heilbrigðisráðherra en Svandísi Svavarsdóttur.“
Mikil umræða um þetta viðtal hefur nú skapast á samfélagsmiðlum. Fjölmiðlamaðurinn Gísli Marteinn Baldursson er á meðal þeirra sem hefur tjáð sig um málið, en í færslu á Twitter sagði hann að vinsældir Svandísar færu illa í „Þjóðernisíhaldið“ sem hamaðist því henni.
Ég er ekki alltaf hrifinn af ríkisstjórninni. En hún hefur staðið sig vel í baráttunni við faraldurinn og þar fer Svandís fremst í flokki og hefur verðskuldað rokið upp í vinsældum. Þjóðerisíhaldið þolir það ekki og hamast gegn henni. Vel gert Katrín! https://t.co/5xxYhlHjtr
— Gísli Marteinn (@gislimarteinn) March 25, 2021
Blaðamaðurinn Jóhann Óli Eiðsson tjáði sig einnig um málið. Hann sagði að margir hefðu gefist upp í stöðu Svandísar sem héldi ótrauð áfram. Þá finnst honum spurningar um hvort Svandís valdi starfi sínu vera frekar ódýrar.
Heilbrigðisráðherra er nagli. Minni menn hefðu pakkað saman í þessari stöðu en hún hefur haldið áfram af heilindum og hugsjón (þótt mér finnist hugsjónin stundum stöngin út en látum það liggja milli hluta).
Spurningar um hvort hún sé starfi sínu vaxin eru því IMO frekar cheap.
— Jóhann Óli Eiðsson (@jedissson) March 25, 2021
Sólborg Guðbrandsdóttir tónlistarkona, fyrirlesari og lögfræðinemi, lýsti einnig yfir stuðningi við Svandísi, og sagðist þakklát fyrir að hún væri heilbrigðisráðherra.
Þeir eru nú ekki margir, aðilarnir á þingi, sem ég hefði treyst til að sinna starfi heilbrigðisráðherra á þessum tímum, án þess að láta það snúast um sig. Mikið ofboðslega er ég þakklát fyrir það að það var Svandís Svavarsdóttir.
— Sólborg Guðbrands (@solborgg) March 25, 2021
Einnig hafa myndast gríðarlega miklar og heitar umræður um málið í Facebook-hópnum Fjölmiðlanördar. Þar eru skiptar skoðanir á málinu, en á meðal þeirra sem tjáði sig var Jakob Bjarnar Grétarsson blaðamaður, en hann skrifaði frétt um málið á Vísi.is. Hann telur að fjölmiðlamenn séu hvað eftir annað gagnrýndir fyrir að vera ekki nægilega hvassir, en þegar það gerist verði fólk miður sín.
„Það er alltaf verið að jagast í því að fjölmiðlamenn spyrji ekki nógu hvasst. Svo þegar það gerist fá allir hland fyrir hjartað og fara að jarma bull. Virkilega góð frammistaða hjá Frosta.“
Börkur Gunnarsson, rithöfundur, leikstjóri og blaðamaður, var á meðal þeirra sem tók til máls í fjölmiðlanördum. Hann hrósaði bæði félögunum í Harmageddon fyrir óvægnar spurningar sínar og Katrínu fyrir sín svör og heiðarleika.
„Var svo heppinn að heyra þetta viðtal í útvarpinu í bílnum í morgun. Allt í lagi að Frosti sé orðinn andstyggilegur af of mörgum mánudagsfundum með sósíalistaforingjanum Gunnari Smára. Mér fannst Katrín vaxa af þessu viðtali og Harmageddon sanna sig sem súper útvarpsþátt. Þetta var gott þríeyki að sanna sig. Harðar og óvægnar spurningar frá spyrlum er það besta sem heiðarlegt fólk eins og Katrín Jakobs fær.“
Blaðamaðurinn Andrés Magnússon tjáði sig einnig um málið. Hans skoðun er sú að spurning Frosta sé góð og gild, sérstaklega þegar verkefni ráðherra eru jafn stór og einmitt núna. Honum finnst líklegt að Svandísi hafi verið hlíft vegna aðstæðna sinna, en segir að það ástand gangi ekki til lengdar. Andrés tekur þó líka fram að svör Katrínar séu skiljanleg.
„Þetta er alveg valíd spurning gagnvart hvaða ráðherra sem er, ef upp koma efasemdir um að þeir geti einbeitt sér að sínum störfum. Þá auðvitað enn frekar þegar svo mikið er í húfi sem nú og verkefnin aldrei stærri eða
Ég hugsa að til þessa hafi Svandísi fremur verið hlíft í fjölmiðlum vegna álags og persónulegra aðstæðna, en það segir sig sjálft að það gengur ekki að eilífu og ráðherra hefur raunar þurft að taka sér leyfi af þeim ástæðum.
Fjölmiðlafólk þekkir það líka að það getur verið ævintýralega erfitt, ómögulegt stundum, að slíta svör út úr heilbrigðisráðuneytinu um jafnvel grundvallaratriði og mjög mikilvægar ákvarðanir. Og það getur líka verið mjög erfitt að ná í ráðherrann.
Þegar upp koma efasemdir um skynsamleika stefnumótunar eða árangur, spurningar um grafalvarlega hluti eins og Landakot og fráflæðisvandann sem ekki var sinnt, þá gengur ekki að ráðherrann sé ekki til tals, nú eða hitt að fjölmiðlar kunni ekki við að spyrja sakir óhóflegrar tillitssemi.
Svo spurning Frosta er fyllilega tæk. En á sama hátt skilur maður svör Katrínar vel,“
