Líkt og flestir vita þá voru samkomutakmarkanir hertar verulega á miðnætti vegna aukinna smita í samfélaginu. Katrín Jakobsdóttir, forsætisráðherra, mætti í útvarpsþáttinn Harmageddon á X-inu í morgun til þess að ræða um mál tengd faraldrinum. Hún og annar stjórnandi þáttarins, Frosti Logason, tókust á í beinni útsendingu, en Frosti spurði meðal annars hvort Svandís Svavarsdóttir, heilbrigðisráðherra, væri að sinna starfi sínu nægilega vel.

Viðurkenndi að þetta væri að ganga hægt

Í þættinum var Katrín spurð út í bóluefnaáætlun Íslands, sem Frosti fullyrti að væri „eitt allsherjar klúður“ sem hefði „gjörsamlega misheppnast“.

Því svaraði Katrín: „Nú má spyrja sig hvers vegna þessi ákvörðun var tekin á þessum tíma og ég held að hún hafi byggt á mjög skynsamlegum rökum sem var að fara í samstarf, ekki bara með ESB heldur okkar helstu bandalagsþjóðum.“

„Hugmyndafræðin er sú að það er ekki bara verið að semja við einn aðila, heldur sex aðila, um kaup og þróun bóluefnis sem var auðvitað ekki tilbúið.“

Katrín sagði að eins og staðan væri núna séu 20.000 einstaklingar fullbólusettir, en næstum því 40.000 manns sem eru búnir að fá fyrri skammtinn af bóluefni. Hún segir það vera nokkurn veginn í takt við áætlanir, enda þurfi að líða tími á milli bóluefnisskammtanna, sem eru stundum þrír mánuðir. Hún viðurkenndi þó að þetta hefði gengið svolítið hægt.

„Það er hins vegar alveg rétt að í fyrsta lagi að það hafa verið tafir á AstraZeneca, og við sögðum það auðvitað bara frá upphafi, eða um leið og það kom í ljós. Og í öðru lagi þá ætla ég líka að segja það að þessi hugmyndafræði: að fara þessa leið að semja við marga, af því við vissum ekki alveg hvað kæmi úr þróun þessara bóluefna. Ég tel að það hafi verið skynsamlegt, en þetta hefur gengið svolítið hægt.“

„Nei nú ætla ég að segja stopp“

Eldfimasta spurningin sem Frosti spurði forsætisráðherra var hvort Svandís Svavarsdóttir, heilbrigðisráðherra, væri hæf í sínu starfi, en Katrínu fannst það furðuleg spurning.

„Er heilbrigðisráðherra raunverulega í stakk búinn til að valda þessu verkefni?“

„Þetta finnst mér nú vera stórfurðuleg spurning satt að segja,“ svaraði Katrín.

Þá minntist Frosti á að Svandís hefði átt í erfiðleikum í sínu persónulega lífi og gaf í skyn að það hefði mikil áhrif á hennar störf en ætla má að hann sé að vísa í erfið veikindi dóttur Svandísar sem greindist með heilaæxli seint á síðasta ári. Þá lést faðir Svandísar, Svavar Gestsson, fyrrum ráðherra og sendiherra á þessu ári.

„Nei nú ætla ég að segja stopp,“ svaraði Katrín. „Nei nú ætla ég að segja stopp þegar farið er að draga einhverja persónulega erfiðleika inn í málið,“ sagði Katrín og fullyrti að ansi fáar þjóðir hefðu staðið sig jafn vel í baráttunni við faraldurinn og Ísland. Þá vildi hún meina að engin gæti sinnt störfum Svandísar jafn vel og hún sjálf.

„Ert þú að spyrja mig í alvöru hvort heilbrigðisráðherra geti valdið starfinu sínu?“  Í framhaldinu segir hún að  Svandís hafi staðið sig mjög vel. “ Við gætum ekki haft betri heilbrigðisráðherra en Svandísi Svavarsdóttur.“

Viðtalið í heild sinni má heyra hér.

Dóttir Svandísar greind með heilaæxli – „Þetta er stærsta verkefni lífs míns.“