„Þær fréttir getum við nú flutt ykkur að enski knattspyrnumaðurinn Rees Greenwood hefur skrifað undir samning við knattspyrnudeild ÍR um að leika með félaginu í 2.deildinni sumarið 2021,“ segir á vef ÍR.

ÍR sem leikur í 2. deild karla hefur náð í leikmann sem spilað hefur í ensku úrvalsdeildinni. Rees kemur úr norðausturhluta Englands, var ungur valinn í akademíu Sunderland FC og lék með þeim allt upp í aðallið þar sem hann náði m.a. úrvalsdeildarleik á þeim tíma sem Big Sam Allardyce var við stjórnvölinn. Um var að ræða leik gegn Watford árið 2016 sem endaði 2-2.

Eftir að að hafa verið á mála hjá Sunderland fór hann til Gateshead í neðri deildum Englands og þaðan til Falkirk í Skotlandi. Þaðan lá leiðin aftur í neðri deildir Englands áður en boltinn færði hann til Sameinuðu arabísku furstadæmanna nú í vetur þar sem hann lék með Al-Sahel.

Greenwood er grjótharður skapandi miðjumaður sem náði m.a. þeim árangri að leika með yngri landsliðum Englands. Hann er fæddur í desember 1996 og því á sínu 25. aldursári.

Arnar Hallsson þjálfari ÍR er spenntur að fá Greenwood til ÍR. „Ég er mjög spenntur fyrir því að vinna með Rees. Hann hefur ótvíræða hæfileika sem leikmaður og mun styrkja okkar lið mikið. Ennfremur held ég að hann muni hjálpa okkar ungu leikmönnum að þroskast og bæta sig sem leikmenn.“