News.com.au skýrir frá þessu. Fram kemur að málið snúist um síðustu viðskiptaferð Greg á vegum Toyota en hún var til Melbourne. Hann fékk leyfi til að taka eiginkonu sína og tvö börn með í ferðina gegn því skilyrði að hann notaði greiðslukort fyrirtækisins eingöngu til að greiða fyrir gistingu og mat fyrir sjálfan sig, öðru yrði hann að bera kostnað af sjálfur.
Í ferðinni ákvað Greg að gefa syni sínum eina pitsusneið, af pitsu sem hann hafði greitt með fyrirtækjakortinu, því hann hafði ekki lyst á henni sjálfur. Þetta var augljóst brot á reglum fyrirtækisins að mati þess og héldu forsvarsmenn þess því fram að Greg hefði greitt fyrir kvöldmat sonar síns með greiðslukorti fyrirtækisins. Að auki taldi fyrirtækið að Greg hefði gist á dýrara hóteli en rætt hafði verið um. Hann var því rekinn samstundis og fékk sem svarar til um 10 milljóna íslenskra króna í bætur frá fyrirtækinu.
Greg var ekki sáttur við þetta og benti á að gistingin hefði verið dýrari en ella því ferðin hafi verið farin á sama tíma og Australian Open í tennis stóð yfir. Hann stefndi því Toyota og krafðist sem svarar til 27 milljóna íslenskra króna til viðbótar við þær 10 sem hann fékk strax frá fyrirtækinu. Hann sagðist eiga rétt á þessari upphæð samkvæmt samningi við fyrirtækið og að því hefði ekki verið stætt á að svipta hann greiðslunni.
Dómari var sammála honum og dæmdi Toyota til að greiða honum þessa upphæð því fyrirtækið hefði ekki haft réttmæta ástæðu til að reka hann. Dómarinn sagði að Toyota hefði aldrei gert athugasemd við störf Greg og að hann hefði margoft sett hagsmuni fyrirtækisins ofar sínum eiginn. Þess utan gat Toyota ekki sannað að Greg hefði brotið reglurnar svo alvarlega að það réttlætti uppsögn án þess að hann fengi aðvörun fyrst.
