Arnar Þór Viðarsson þjálfari íslenska landsliðsins segir það tóma vitleysu í Guðmundi Benediktssyni að leikmenn hafi fengið að velja sér verkefni nú þegar bæði A-landslið karla og U21 árs landsliðið eru á leið í verkefni.

Guðmundur sagði frá því í hlaðvarpsþætti á Vísir.is að leikmenn hefðu fengið að velja hvort þeir væru í A-landsliði karla sem er á leið í undankeppni HM eða í U21 árs liði karla sem er á leið í lokakeppni EM. Arnar Þór valdi sinn fyrsta landsliðshóp í dag.

Smelltu hér til að sjá fyrsta landsliðshóp Arnars:

„Það hlýtur að vera niðurstaðan að Alfons og Arnór verði með A-landsliðinu. Síðan sjáum við stráka sem hafa verið í hópnum hjá A-landsliðinu undanfarna mánuði sem eru í U-21 árs liðinu,“ sagði Guðmundur Benediktsson á Vísir.is

„Ég heyrði einhvers staðar orðróm um það, og sel það ekki dýrara en ég keypti það, þessir leikmenn sem eru gjaldgengir í þessa keppni hafi fengið val hvort þeir vildu fara með U-21 árs eða A-landsliðinu, því þeir hafi allir verið inni í myndinni.“

Arnar Þór kynnti hóp sinn í dag fyrir sitt fyrsta verkefni og var spurður út í þessar sögur frá Gumma Ben.

„Finnst þér það líklegt? Þetta sýnir það að Gummi Ben og hans sögur eru ekki alltaf réttar,“ sagði Arnar við spurningunni sem kom frá Elvari Geir Magnússyni, ritstjóra Fótbolta.net

U-21 árs landsliðið heldur í næstu viku í lokamót EM en íslenska landsliðið mætir Þýskalandi, Armeníu og Liechtenstein í undankeppni HM.