Ágúst Ólafur Ágústsson, þingmaður Samfylkingarinnar, skrifaði í gær pistil sem bar yfirskriftina „Sex sjokkerandi staðreyndir um Ísland“ en pistillinn birtist á Vísi. Eins og nafn pistilsins gefur til kynna fór Ágúst yfir sex staðreyndir um Ísland sem gætu komið fólki á óvart. Hér fyrir neðan má sjá staðreyndirnar sem Ágúst nefnir:
Það tekur meðalforstjórann í Kauphöllinni rúmlega einn dag að vinna sér inn mánaðartekjur öryrkjans, eldri borgarans eða þess atvinnulausa. Rúm dagslaun forstjórans eiga að duga hinum í einn mánuð.
Ríkustu 10% Íslendinga eiga meira af hreinum eignum en allir hinir af þjóðinni, sem eru 90% landsmanna.
Fjármagnstekjuskatturinn, sem er sá skattur sem hinir ríku greiða helst, er lægstur á Íslandi af öllum Norðurlöndunum.
Veiðileyfagjöldin, sem helst stóru útgerðirnar borga, lækkuðu um tæp 60% á þremur árum. Árlegur arður sem rennur beint í vasa útgerðarmannsins og fjölskyldu hans er hærri en veiðileyfagjöldin sem eigandi auðlindarinnar, þjóðin, fær.
Nú búa allt að 35 þúsund Íslendingar við fátækt samkvæmt Hagstofunni. Af þeim eru 10 þúsund börn!
Það hafa aldrei jafnmargir þurft nú að sækja sér mataraðstoð á Íslandi.
Eftir að hafa talið upp staðreyndirnar fer Ágúst yfir það sem honum finnst að stjórnmál eigi að snúast um. Það er mjög margt fólk hér á landi sem þarf jafnvel að neita sér um læknisaðstoð og getur ekki veitt börnum sínum það sem jafnöldrum þeirra þykir sjálfsagt. Þetta fólk býr oft í vondum og jafnvel hættulegum húsum. Hér er því fólk sem á allt og hér er fólk sem á ekkert,“ segir hann. „Þetta finnst mér að stjórnmál ættu að snúast um.“
