Ragnar Þór Ingólfsson var í dag endurkjörinn sem formaður VR. Þetta staðfestir Ragnar Þór í samtali við Vísi.
Þátttaka í atkvæðagreiðslunni var sú mesta í sögu félagsins eða um 28 prósent. Ragnar hlaut 63 prósent atkvæða.
Atkvæðagreiðslunni lauk á hádegi í dag en frambjóðendur voru boðaðir á fund klukkan 14 þar sem niðurstaðan var kynnt.
Alls voru 35.919 á kjörskrá, eða allir fullgildir VR-félagar, auk eldri félagsmanna sem hættir eru atvinnuþátttöku vegna aldurs en sem greiddu eitthvert félagsgjald á 67. aldursári og höfðu greitt að minnsta kosti fimmtíu mánuði af sextíu síðustu fimm árin áður en þeir urðu 67 ára.
Helga Guðrún Jónasdóttir hafði boðið sig fram á móti Ragnari og var kosningabarátta þeirra beggja verulega áberandi.
Niðurstöðurnar voru birtar rétt í þessu á vefsíðu VR.
Ragnar Þór hlaut 6.526 atkvæða á móti 3.549 atkvæðum Helgu Guðrúnar. Það gera um 63 prósent á móti 34 prósentum. 271 tóku ekki afstöðu eða 2,6 prósent.
Sjö stjórnarmenn voru kjörnir til tveggja ára.
Svanhildur Ólöf Þórsteinsdóttir, 3.843 atkvæði
Jón Steinar Brynjarsson, 2.698 atkvæði
Helga Ingólfsdóttir, 2.757 atkvæði
Sigurður Sigfússon, 2.600 atkvæði
Kristjana Þ. Jónsdóttir, 2.566 atkvæði
Þórir Hilmarsson, 2.433 atkvæði
Harpa Sævarsdóttir, 2.521 atkvæði
Tóku ekki afstöðu, 3.162 atkvæði
