Wayne Bridge, fyrrum leikmaður Chelsea, var gestur í Rig Biz hlaðvarpinu á dögunum en þar talaði hann meðal annars um þjálfara sinn hjá Chelsea og núverandi þjálfara Tottenham Hotspur, José Mourinho. 

Mourinho hefur yfirleitt verið þekktur sem strangur þjálfari sem vill halda miklum aga yfir leikmönnum sínum og tók Bridge undir það. Hann nefndi þó eitt atvik þar sem portúgalski þjálfarinn ákvað að fara út fyrir stranga og agaða boxið sitt. Atvikið, eða öllu heldur partýið, sem um ræðir átti sér stað á undirbúningstímabili í Bandaríkjunum.

„Við vorum með undirbúningstímabilið í Bandaríkjunum og hann hélt partý,“ segir Bridge og tók fram að um alvöru partý væri að ræða. Hann tók meðal annars fram að rapparinn heimsfrægi Snoop Dogg hafi látið sjá sig. „Það voru allir þarna.“

Þá talaði Bridge einnig um þjálfarahæfileika Mourinho og hrósaði honum. „Hann er frábær þjálfari en ég held að hann hafi átt svolítið erfiðan tíma hjá Manchester United og nú hjá Tottenham,“ sagði Bridge.

„Stundum lítur hann út eins og dekraður krakki sem hendir tuskudýrunum sínum úr kerrunni sinni,“ sagði Bridge einnig og tók fram að það væri fyndið að sjá gamla þjálfarann sinn missa stjórn á skapi sínu. „Ég held að hann bregðist ekki vel við stundum en það er fyndið að horfa á það, ég elska að sjá það gerast.“