Fréttablaðið greindi frá því í morgun að Þórunn Sveinbjarnadóttir, formaður BHM, muni leiða Samfylkinguna í Kraganum í komandi Alþingiskosningum. Guðmundur Andri Thorssn, núverandi oddviti flokksins í Kraganum, mun taka annað sætið en hann staðfesti tíðindin á Facebook-síðu sinni í dag.

„Það er mikil upphefð að setjast á þing. Maður er valinn sem fulltrúi fyrir stefnu og flokk sem þúsundir styðja. Þegar ég var beðinn um það árið 2017 að freista þess að endurvinna þingsæti í Kraganum fyrir Samfylkinguna sló ég til. Það tókst með samstilltu átaki þeirra sem gátu ekki hugsað sér að rödd jafnaðarmanna hljómaði ekki á þinginu. Það munaði hársbreidd að það tækist að vinna annað sætið líka,“ segir Guðmundur en ekki eru allir sáttir með breytinguna.

„Ég er gjörsamlega bit“

Bubbi Morthens, einn ástælasti tónlistarmaður þjóðarinnar, verður seint þekktur fyrir að liggja á skoðunum sínum. Bubbi tjáði sig um fréttirnar í dag en miðað við orð hans er hann afar ósáttur. „Að færa Guðmundur Andri Thorsson niður um sæti er vægast sagt misráðið,“ segir Bubbi í færslu á Facebook-síðu sinni en Hringbraut vakti athygli á ummælunum.

Þá segir Bubbi að ef þetta verður lokaniðurstaðan í kosningunum þá mun hann færa sitt sæti niður í að kjósa ekki Samfylkinguna. „Þannig líður mer með þetta,“ segir hann.

Guðmundur Andri skrifar athugasemd við færslu Bubba þar sem hann segir að ef ætlunin sé að refsa fyrir breytinguna þá sé málið kannski ekki að sleppa því að kjósa flokkinn, því þá er ólíklegra að Guðmundur komist á þing.

„Ég er gjörsamlega bit, þú hefur staðið þig ég kaus þig vegna þess að þú hafðir trúverðugleika og getu til þess að laga ekki bara ásýnd Alþingis heldur voru kannski ekki margir Alþingismenn og konur sem höfðu þá kosti sem þu hefur,“ skrifaði Bubbi við athugasemd Guðmundar. „Nú er ákveðið að verðlauna þig með þessum hætti og okkur sem kusum þig í einhverjum leik sem er ekki sanngjarn.“