Hæstiréttur Bretlands kvað í síðustu viku upp tímamótadóm. Um var að ræða mál Shamima Begum sem krafðist þess að fá að koma til Bretlands til að vera viðstödd réttarhöld þar sem hún krefst þess að fá breskan ríkisborgararétt sinn aftur. Hæstiréttur komst að þeirri niðurstöðu að þjóðaröryggi vægi þyngra en réttur Begum til réttlátrar málsmeðferðar fyrir breskum dómstól og hafnaði kröfu hennar.

Begum, sem er 21 árs, fór til Sýrlands ásamt tveimur vinkonum sínum þegar hún var 15 ára til að ganga til liðs við hryðjuverkasamtökin sem kenna sig við Íslamska ríkið. Hún giftist liðsmanni samtakanna og eignaðist þrjú börn. Óljóst er hversu mörg af börnunum eru á lífi.

Begum dvelur nú í Roj-flóttamannabúðunum í Sýrlandi en í þeim búðum og al-Hol-flóttamannabúðunum er talið að um 70.000 manns dvelji. Hluti þeirra eru konur, sem voru giftar liðsmönnum hryðjuverkasamtakanna, og börn þeirra.

Foreldrar Begum eru frá Bangladess en hún er fædd og uppalin í Bretlandi. Hún var svipt breskum ríkisborgararétti 2019 eins og fleiri Bretar sem fóru til Sýrlands og Írak til að berjast með hryðjuverkasamtökum.

Begum var ekki sátt við að hafa verið svipt ríkisborgararétti, sem hefur í för með sér að hún getur ekki farið til Bretlands, og fór með málið fyrir dómstóla. Á síðasta ári kvað millidómstig upp úr um að hún mætti koma til Bretlands til að vera viðstödd réttarhöldin. Málinu var áfrýjað til hæstaréttar sem hefur nú komist að annarri niðurstöðu eins og fyrr sagði.

Dómurinn sagði að svo mikil ógn stafi af Begum að það sé réttlætanlegt að banna henni að koma til landsins þegar mál hennar verður tekið fyrir. Dómurinn byggir niðurstöðu sína að stórum hlut á mati leyniþjónustustofnana sem segja að eiginkonur og ekkjur liðsmanna Íslamska ríkisins séu tifandi sprengjur undir öryggi Vesturlanda.