Síðastliðinn þriðjudag birtist auglýsing í Morgunblaðinu frá Öglu Gosgerð þar sem drykkurinn Jesúlaði er auglýstur. Auglýsingin féll ekki í kramið hjá öllum og en DV greindi frá færslu Ragnhildar Pálu Ófeigsdóttur, ljóðskálds, þar sem hún sakar gosgerðina um guðlast.

Í dag sendi gosgerðin frá sér yfirlýsingu vegna drykkjarins þar sem nafnið „Jesúlaði“ er útskýrt nánar. Yfirlýsinguna má lesa hér fyrir neðan.

„Páskarnir eru sigurhátíð Jesú Krists. Þessi hátíð er haldin vegna þess að Jesú, þessi uppreisnarseggur, kom öllum á óvart með því að gera nákvæmlega það sem hann hafði lofað: Hann sigraði sjálfan dauðann og færði okkur um leið fyrirgefningu syndanna. 

Gosgerðarmeistarinn hefur alltaf hrifist af því sem kemur á óvart – ekki síst þegar gjörsigrun er annars vegar. Honum fannst því liggja beint við að hafa Jesú uppi á borðunum meðan á sigurhátíðinni stendur og heiðra upprunalega uppreisnarsegginn með vönduðum gosdrykk úr hágæða náttúrulegum hráefnum svo hann gleymist ekki á bak við öll páskaeggin og lambakjötið. Hjá Öglu Gosgerð snýst allt um innihaldið – og ættu páskarnir ekki að gera það líka?

Að lokum er minnt á að, rétt eins og gildir um aðra drykki Öglu Gosgerðar, þá er bannað að þamba Jesúlaði.“