Norður-Kórea er að öllu jöfnu nær algjörlega lokað land enda mikilvægt að halda þjóðinni frá því að eiga samskipti við fólk af öðru þjóðerni svo hún sjái ekki hversu slæmt ástandið er í heimalandinu og fari í framhaldinu að véfengja umboð einræðisstjórnarinnar til að stýra landinu. Vegna heimsfaraldurs kórónuveirunnar hefur landinu verið lokað enn frekar og er það nú að segja má algjörlega lokað. Þessu fengu rússneskir stjórnarerindrekar og fjölskyldur þeirra að kenna á í síðustu viku þegar fólkið ætlaði heim til Rússlands.

Við venjulegar aðstæður hefði fólkið farið með lest yfir til Rússlands en lestarsamgöngur liggja niðri vegna heimsfaraldursins. Fólkið þurfti því að leggja á sig 32 klukkustunda ferðalag eftir því sem segir á Facebooksíðu rússneska utanríkisráðuneytisins. „Við urðum að fara langa og erfiða leið heim. Fyrst 32 klukkustundir með lest, síðan tvær klukkustundir í rútu til landamæranna,“ segir í færslunni.

Þegar að landamærunum voru ekki fleiri hestöfl í boði til að flytja fólkið og varð því að fara síðasta spölinn yfir landamærin á járnbrautarvagni sem ekki var vélknúinn. Þetta var eins kílómetra leið og var það Vladislav Sorokin, sendiráðsritari, sem var svo „heppinn“ að fá að ýta vagninum áfram. Á honum var síðan samferðafólk hans og farangur. Sorokin fékk þetta verkefni þar sem hann var eini karlmaðurinn í hópnum en konurnar aðstoðuðu hann auðvitað á erfiðustu köflunum.

Leið hópsins lá yfir Tumenána og síðan yfir landamærin þar sem samlandar fólksins tóku á móti þeim. Sorokin hefur væntanlega verið hvíldinni feginn þegar hann komst til Rússlands.