Chelsea fengu Manchester United í heimsókn á Stamford Bridge í ensku úrvalsdeildinni í dag. Thomas Tuchel var að stýra Chelsea í níunda skiptið og á hann enn eftir að tapa með liðið. Liðin gerðu 0-0 jafntefli í fyrri leik sínum á leiktíðinni og voru það einnig úrslitin í dag.

Hvorugt lið virtist mjög áhugasamt á því að vinna leikinn og ekkert sérstaklega góður fótbolti var spilaður. Mikið af feilsendingum og menn oft að missa boltann.

Stærsta atvik leiksins var í fyrri hálfleik þegar boltinn fór í hendina á Callum Hudson-Odoi innan vítateigs Chelsea. Dómarinn virtist ekki sjá atvikið og leikurinn hélt áfram en var að lokum stöðvaður fyrir VAR-skoðun. VAR taldi hins vegar ekki vera ástæða til að dæma vítaspyrnu og leik því haldið áfram.

Manchester United-menn eru enn í öðru sæti deildarinnar með 50 stig, tólf stigum á eftir toppliði Manchester City og Chelsea sitja í 5. sætinu, einu stigi frá meistaradeildarsæti.

Þessi helgi var mikil gleði fyrir stuðningsmenn Manchester City þar sem að liðin fjögur fyrir neðan þá töpuðu öll stigum og juku þeir þar með forskot sitt ágætlega.