Trent Alexander Arnold, bakvörður Englandsmeistara Liverpool, segir að liðið hafi fallið í gildru á tímabilinu. Liverpool hefur ekki gengið sem skyldi eftir frábært gengi á síðasta tímabili.

„Gildran sem við höfum fallið í á þessu tímabili er sú að við nánast bjuggumst við því að vinna leiki fyrirfram vegna þess að við vitum hversu mikil gæði við höfum fram á við til þess að finna úrslitamarkið,“ sagði Alexander Arnold í viðtali sem birtist í leikskrá Liverpool.

Leikmenn Liverpool hafi vanist þessari tilfinningu á síðasta tímabili þegar liðið varla tapaði leik og því hafi það reynst erfitt fyrir liðið að venjast verra gengi á þessu tímabili.

„Þetta gerðist náttúrulega á síðasta tímabili og tímabilið fyrir það. En þegar að við skoðum þetta nánar þá var þetta ekki eingöngu heppni. Þetta gerðist vegna þess að við lögðum hart að okkur, við gerðum grunnatriðin vel og byggðum leik okkar á góðum grunni alveg fram að síðustu mínútu leiksins,“ sagði Trent Alexander Arnold, leikmaður Liverpool.

Liverpool er sem stendur í 6. sæti ensku úrvalsdeildarinnar með 40 stig eftir 25 leiki og er liðið 19 stigum á eftir toppliði Manchester City en það virtist óhugsandi niðurstaða fyrir tímabilið.

„Á þessu tímabili tel ég að við höfum gleymt nokkrum af þessum grunnatriðum og við bjuggumst við sigri vegna þess að sigurtilfinningin var orðin náttúruleg fyrir okkur,“ sagði Trent Alexander Arnold.