Mikil fækkun var í skráðum hegningarlagabrotum á höfuðborgarsvæðinu í janúar, en alls voru 666 brot tilkynnt til lögreglu en 806 brot voru tilkynnt í desember síðastliðnum. Samkvæmt mánaðarskýrslu Lögreglunnar á höfuðborgarsvæðinu fjölgaði skráningum á kynferðisbrotum í janúar, en það má rekja til aðgerða lögreglunnar í vændismálum. Undanfarnar vikur hefur Lögreglan á höfuðborgarsvæðinu verið í sérstökum aðgerðum tengdum mansali en vændi er ein af birtingarmyndum mansals.

Eini flokkurinn þar sem tilkynningum fjölgar er manndráp og líkamsmeiðingar. Í öðrum flokkum var mæld fækkun eða mæling innan marka svo ekki er hægt að greina hvort um fjölgun eða fækkun sé að ræða milli ára.

Umferðarlagabrotum fjölgaði milli desember og janúar og voru þau 646 í janúar en brot mæld með hraðamyndavélum eru ekki skráð í þá tölu. Ölvun við akstur var meiri, en 66 brot voru skráð, miðað við 56 í desember. Mikil fækkun var á þjófnuðum og innbrotum og kemur fram í skýrslunni að 288 slík brot voru framin í janúar en 371 í desember.

Ofbeldi gagnvart lögreglumönnum hefur aukist í janúar en fimm brot voru skráð. Ölvun við akstur og akstur undir áhrifum fíkniefna stendur nánast í því sama milli mánaða eða 201 brot í janúar á móti 205 brotum í desember.