Nora Tass Moreno, erlend kona sem Héraðsdómur Reykjaness dæmdi í 15 mánaða fangelsi, þar af 12 mánuðir skilorðsbundið, finnst ekki. Dómurinn yfir henni var auglýstur í Lögbirtingablaðinu í morgun sem er gert þegar ekki tekst að birta dæmdum einstaklingi dóm yfir sér.

Þrír mánuðir af refsingunni eru óskilorðsbundnir, og þarf Nora því að sitja þá af sér í íslensku fangelsi.

Konan var handtekin í ágúst í fyrra þegar tollverðir á Keflavíkurflugvelli fundu rétt tæp 15 kíló af kannabisefnum í farangri hennar. Konan var á leið heim frá Malaga á Spáni með millilendingu í Frankfurt. Nora mætti fyrir héraðsdóm við þingfestingu málsins og játaði þar sök sína skýlaust. Litið var til játningar konunnar og þess að hún hefur ekki áður gerst brotleg við lög hér á landi við ákvörðun refsingarinnar.

Til viðbótar við ákvarðaða refsingu þarf konan að greiða 206 þúsund krónur.

Í ljósi þess að ekki hefur tekist að birta konunni dóminn er óvíst hver næstu skref íslenskra yfirvalda verða. Embætti Héraðssaksóknara hefur ekki svarða fyrirspurnum DV um hvort lýst verði eftir konunni með tilstillan Interpol eða Europol eða handtökuskipun á hendur henni gefin út.