Einn þeirra sem sérsveit ríkislögreglustjóra handtók í sumarbústað í námunda við Selfoss í nótt vegna rannsóknar á morðinu í Rauðagerði síðastliðna helgi var samkvæmt öruggum heimildum DV, Anton Kristinn Þórarinsson, oft kallaður Toni.
Albanskur karlmaður var á laugardagskvöld myrtur fyrir utan heimili sitt með skotvopni. Hafa fjölmiðlar sagt frá því að maðurinn hafi verið skotinn oft og meðal annars í höfuðið. Morðinu hefur verið lýst sem „hreinni aftöku.“ Maðurinn lætur eftir sig ólétta eiginkonu sína og ungt barn. Hjónin keyptu húsið við Rauðagerði í nóvember í fyrra og voru ný flutt þangað inn.
Tekið skal fram að eðli tengsla Antons við morðmálið liggur ekki fyrir og lögregla hefur hvorki viljað staðfest opinberlega að um Anton sé að ræða eða hvort að hann sé grunaður um beina aðild að morðinu.
Í samtali við DV sagði Margeir Sveinsson, aðstoðaryfirlögregluþjónn hjá Lögreglunni á höfuðborgarsvæðinu, að engar upplýsingar yrðu veittar um málið umfram það sem kemur fram í tilkynningu.
Í samtali við lögmann mannsins, Steinberg Finnbogason, sagðist hann geta staðfest að hann væri lögmaður manns sem væri í haldi lögreglu, en það væri ekki í hans verkahring að staðfesta nafn mannsins sem um ræðir. Að öðru leyti gat Steinbergur ekki tjáð sig um málið.
Mikið var fjallað um Anton Kristinn í tengslum við gagnaleka úr herbúðum Héraðssaksóknara og lögreglunnar í janúar síðastliðinn. Þar var Anton sagður hafa verið uppljóstrari lögreglunnar á árum áður. Í gögnunum kom fram að upplýsingasamband Antons við lögreglu hafi hafist árið 2006.
Í tilkynningu sem lögreglan sendi fjölmiðlum nú í morgun sagði að þrír hefðu verið handteknir í „viðamiklum aðgerðum“ Lögreglunnar á höfuðborgarsvæðinu. Sagði þar jafnframt að húsleitir hefðu verið framkvæmdar í umdæminu og utan þess og að Lögreglan á höfuðborgarsvæðinu hefði notið aðstoðar sérsveitar ríkislögreglustjóra auk annarra lögregluembætta.
Lögreglan sagði frá því um helgina að hún hefði handtekið erlendan karlmann á fertugsaldri stuttu eftir skotárásina í húsi í Garðabæ og að sá hefði verið úrskurðaður í fjögurra daga gæsluvarðhald. Lengd gæsluvarðhaldsins hefur vakið athygli, en fjórir dagar þykir mjög stuttur tími í ljósi alvarleika málsins. Hefur það vakið grunsemdir um að sönnunargögn sem lögregla lagði fram hafi ekki nægt fyrir lengri gæsluvarðhaldsúrskurði.
Herma heimildir DV að mennirnir tveir sem handteknir voru með Antoni í sumarbústaðnum séu erlendir.
Vísir sagði frá því í gær að morðvopnið væri ekki fundið.
Málið hefur vakið mikinn óhug hér á landi enda óalgengt að skotvopn komi við sögu í ofbeldismálum, sér í lagi með þeim hætti sem hér um ræðir.
