Dpa skýrir frá þessu. Fram kemur að rannsóknin byggist á 2,897 smituðum Ísraelsmönnum sem höfðu verið bólusettir. Magn kórónuveiru í hálsi og nefi þeirra var mælt. Niðurstaðan var að magnið var fjórum sinnum minna en hjá þeim sem ekki höfðu verið bólusettir.
Dpa hefur eftir Clemens Wendtner, lækni og sérfræðingi á sjúkrahúsi í München, að rannsóknin „gefi tilefni til að vona“. „Bóluefnið BNT162b2 (sem er bóluefnið frá Pfizer og BioNTech, innsk. blaðamanns) veitir ekki aðeins einstaklingsbundna vernd. Það má draga þá ályktun að með nægilega mörgu bólusettu fólki náist ákveðin vernd fyrir fólk í formi hjarðónæmis,“ er haft eftir honum.
Rannsóknin hefur ekki verið ritrýnd. Sýni voru tekin úr fólkinu þegar að minnsta kosti 12 dagar voru liðnir frá bólusetningu. Áður hefur komið fram að magn veirunnar tengist því hversu smitandi hún er. Vísindamennirnir draga því þá ályktun að bóluefnið hafi líklega áhrif á hversu smitandi veiran er. „Minna magn veirunnar bendir til að hún sé minna smitandi en það bætir enn við áhrif bóluefnisins á útbreiðslu veirunnar,“ segja þeir.
Það þarf þó að hafa í huga að rannsóknin hefur ákveðnar takmarkanir. Fyrir það fyrsta þá voru þátttakendurnir ekki valdir af handahófi. Þeir eru allir félagar í Maccabi Healht Service og í hópi 650.000 sjúkratryggðra sem fengu tvo skammta af bóluefni Pfizer og BioNTech. Að auki var magn veirunnar ekki rannsakað yfir lengra tímabil og ekki var rannsakað hversu marga hver og einn smitaði að meðaltali.
