Samsæriskenningasmiðir og andstæðingar bólusetninga hafa lengi haft horn í síðu Bill Gates, stofnanda Microsoft, og telja hann einhverskonar höfuðpaur í samsæri sem gangi út á að lauma örflögum í fólk með því að bólusetja það gegn kórónuveirunni sem nú tröllríður heimsbyggðinni. Því hefur verið haldið fram að Gates vilji með þessu geta stýrt hugsunum fólks og hreyfingum.

Þetta hefur auðvitað ekki farið fram hjá dóttur hans, Jennifer K. Gates, sem hefur nú verið bólusett gegn veirunni. Hún nýtti tækifærið til að birta mynd af sér á Facebook þar sem hún skýrir frá bólusetningunni og gerir grín að samsæriskenningasmiðum og andstæðingum bólusetninga.

https://www.facebook.com/JenniferKGatesOfficial/posts/761429708139877

„Því miður var bráðsnjall faðir minn ekki græddur í heila minn í gegnum bóluefnið,“ skrifaði hún meðal annars. Með þessum orðum beindi hún spjótum sínum augljóslega að andstæðingum bólusetninga og samsæriskenningasmiðum.

Jennifer stundar læknanám í New York og af þeim sökum stóð henni til boða að verða bólusett. „Ég er þakklát fyrir að bóluefnið mun vernda mig og veita mér öryggi í störfum mínum í framtíðinni,“ skrifaði hún.