Jurgen Klopp, stjóri Liverpool er elskaður og dáður af stuðningsmönnum félagsins og það eðlilega. Klopp tókst að koma Liverpool aftur í fremstu röð eftir erfið ár, sigurinn í ensku úrvalsdeildinni á síðustu leiktíð færði stuðningsmönnum félagisns ómælda gleði. Veðbankar á Englandi telja mestar líkur á því að Jurgen Klopp stjóri Liverpool hætti næstur í starfi í ensku úrvalsdeldinni. Titilvörn Liverpool hefur ekki gengið vel og virðist liðið í frjálsu falli þessa dagana.

Liverpool hefur tapað þremur deildarleikjum í röð og virðist útilokað að liðið endurheimti titil sinn. Umræðan getur verið fljót að breytast í ensku úrvalsdeildinni og nú velta margir framtíð Klopp fyrir sér. Gengi Liverpool hefur ekki bara haft áhrif á Klopp en móðir hans lést á dögunum, vegna faraldursins getur Klopp ekki farið til Þýskalands og gengið með hana síðasta spölinn.

Stuðningsmenn Liverpool vildu senda honum kveðju og hengdu upp borða fyrir utan Anfield. „Jurgen Klopp, þú gengur aldrei einn,“ stendur á borðanum fyrir utan Anfield sem má sjá hér að neðan.

Klopp segir að stuðningsmenn liðsins þurfi ekki að hafa áhyggjur af sér. „Þetta er fallega gert en ekki nauðsynlegt, ég þarf engan sérstakan stuðning þessa dagana,“ sagði Klopp.

„Ég þarf ekkert frí, það síðasta sem ég vil gera er að tala um einkamál mín. Það vita allir að þetta hefur verið erfitt. Ég er 53 ára gamall, ég hef verið í fótboltanum í 30 ár og þjálfað í 20 ár. Ég get skilið hlutina eftir.“

„Ég er með einkamál en í vinnunni er ég í vinnunni. Það þarf ekki að hafa áhyggjur af mér, skeggið verður meira og meira grátt. Ég sef lítið en er fullur af orku.“