Eiður Smári Guðjohnsen aðstoðarlandsliðsþjálfari segir það góð tíðindi fyrir íslensku þjóðina að Jóhann Berg Guðmundsson sé komin á fulla ferð með Burnley í ensku úrvalsdeildinni.

Eftir erfiða tíma hefur Jóhann Berg spilað síðustu ellefu leiki Burnley, hann hefur svo skorað í síðustu tveimur deildarleikjum. Jóhann Berg skoraði eitt mark í jafntefli gegn Brighton fyrir rúmri viku og skoraði svo annað í 3-0 sigri á Crystal Palace um helgina.

„Við þurfum á þessu að halda og það er bara virkilega gaman að sjá ekki bara að hann sé að skora, heldur að Jói sé að spila og ná að tengja saman leiki,“ sagði Eiður Smári Á Vellinum á Símanum í gær þegar farið var yfir ensku úrvalsdeildina.

Jóhann Berg hafði verið talsvert meiddur síðustu mánuði og ár en hefur á þessu ári haldið heilsu og unnið sér fast sæti í byrjunarliði Burnley.

„Það sem hefur verið vandræði fyrir hann eru meiðslin, þau hafa strítt honum of lengi. Það hefur haldið honum á hliðarlínunni, ég er nokkuð viss um að það hafi verið erfitt fyrir hann,“ sagði Eiður Smári.

Eiður Smári segir að góð heilsa Jóhanns séu gleðitíðindi fyrir Ísland en fyrsta verkefni Arnars Þórs Viðarssonar, Eiðs Smára og Lars Lagerback með landsliðið verður í lok mars. „Þetta gefur honum, Burnley, íslenska landsliðinu og íslensku þjóðinni mikið,“ sagði Eiður Smári á Vellinum á Símanum í gær