„Um allt land þekkja foreldrar, makar, börn, systkini og vinir sársaukann sem fylgir því að ástvinur falli fyrir byssukúlum,“ sagði Biden í yfirlýsingu sinni að sögn BBC.
Margir af þeim unglingum, sem lifðu árásina í Parkland af, eru nú áberandi talsmenn þeirra sem vilja endurbætur á bandarískri vopnalöggjöf.
Annar viðauki bandarísku stjórnarskrárinnar tryggir rétt fólks til að bera skotvopn til að verja sjálfa sig og sína nánustu. Margir íhaldsmenn verja þennan rétt með kjafti og klóm, þar á meðal Donald Trump, forveri Biden í Hvíta húsinu.
Í yfirlýsingu sinni hvatti Biden einnig til að tekin yrði upp sú regla að ferill allra, sem vilja kaupa skotvopn, verði kannaður, að bannað verði að selja skothulstur sem taka mörg skot og að vopnaframleiðendur verði sviptir friðhelgi fyrir lögsóknum. „Þetta skuldum við öllum sem hafa misst einhvern og öllum syrgjendunum sem sitja eftir. Nú er kominn tími til aðgerða,“ sagði Biden að sögn BBC.
Nancy Pelosi, leiðtogi Demókrata í fulltrúadeildinni og formaður deildarinnar, sendi einnig frá sér yfirlýsingu í gær þar sem hún sagði að fulltrúadeildin muni endurlífga lagafrumvarp um ferilkönnun væntanlegra skotvopnakaupenda en frumvarpið dagaði upp á valdatíma Trump. „Í samvinnu við meirihluta Demókrata í öldungadeildinni og ríkisstjórn Joe Biden, forseta, og Kamala Harris, varaforseta, munum við samþykkja þessi og önnur lífsbjargandi lagafrumvörp og tryggja þær framfarir sem íbúar í Parkland og bandaríska þjóðin á skilið og krefst,“ segir í yfirlýsingu hennar.
Demókratar eru með meirihluta í fulltrúadeildinni en í öldungadeildinni eru 50 Repúblikanar, 48 Demókratar og 2 óháðir, sem kjósa yfirleitt í takt við Demókrata. Kamala Harris, varaforseti, fer með úrslitaatkvæðið ef atkvæði falla jafnt í deildinni.
