Klukkan hálfellefu í gærkvöld var tilkynnt til lögreglu um útitónleika í miðbænum, þar sem hópur fólks var samankominn. Er þetta sagt gerast ítrekað. Tónleikahaldarinn var kærður fyrir brot á lögreglusamykkt og brot á sóttvarnalögum. Engin heimild var fyrir tónleikunum og hefur lögregla áður sinnt samskonar tilkynningum.

Þetta kemur fram í dagbók lögreglu. Þar segir einnig frá því að í gærkvöld var farið í skipulagt eftirlit á veitingahús í miðborginni. Hugað var að hvort farið væri eftir reglugerð um takmörkun á samkomum. Eftirlit var haft með hámarki gesta í hverju rými, svæðisskiptingum, að afgreitt væri í sæti og hvort farið væri eftir því að hleypt yrði ekki inn nýjum viðskiptavinum eftir kl 21:00. Þá var eftirlit eftir kl 22:00 með lokun skemmtistaða í miðbænum. Enn fremur ítrekaði lögregla við starfsfólk  að veitingastaðir ættu að loka kl. 22:00 og gestir ættu að vera farnir út kl. 22:00.

Út út eftirlitinu kom að einn veitingastaður á hugsanlega von á kæru fyrir brot á sóttvarnalögum annars vegar og fyrir brot á lögum um veitingastaði, gististaði og skemmtanahald hins vegar. Annar veitingastaður á hugsanlega von á kæru fyrir brot á sóttvarnalögum. Á báðum stöðunum voru of margir gestir samankomnir.