„Kraftaverkalyfið“ sem Netanyahu bauð gríska starfsbróður sínum er tilraunalyf, sem nefnist EXO-CD24, og var þróað af prófessor Nadir Arber. Á síðustu vikum hafa 30 sjúklingar, sem voru alvarlega veikir af COVID-19, á Ichilov-sjúkrahúsinu í Tel Aviv fengið lyfið. 29 þeirra náðu sér að fullu á þremur til fimm dögum. Það tók lyfið aðeins fleiri daga að virka á síðasta sjúklinginn en hann hefur nú einnig náð sér að fullu.
Ísraelsmenn segja að meðferðin með EXO-CD24 sé hugsanlega afgerandi vendipunktur í meðferð COVID-19-sjúklinga. „Þetta er nýtt meðferðarúrræði sem er hægt að framleiða á ódýran hátt og mjög hratt. Jafnvel þótt að bóluefnin virki, eins og við vonum, og jafnvel þótt kórónuveiran stökkbreytist ekki mikið hér eftir, þá verður COVID-19 með okkur í framtíðinni og aðferð sem þessi getur orðið mikilvægt vopn í baráttunni gegn henni,“ sagði Nadir Arber, sem starfar hjá Souraski Medical Center, í samtali við Jerusalem Post.
Mörg COVID-19 dauðsföll tengjast því að ónæmiskerfi líkamans ræðst á heilbrigðar frumur. Nýja lyfið kemur C24 prótíni til lungnanna en það hjálpar til við að skapa ró í ónæmiskerfinu. EXO-CD24 er andað að sér í nokkrar mínútur, einu sinni á dag í fimm daga. Þannig berst það beint niður í lungun. Vísindamenn segja þetta mun betri kost en að láta allan líkamann fara í gegnum svipaða prótínmeðferð.
„Rannsóknin á bak við þetta tilraunalyf er langt komin og vönduð og þessi aðferð getur bjargað mörgum mannslífum. Niðurstöður fyrstu tilrauna eru framúrskarandi og vekja miklar vonir um að hægt sé að halda áfram með þessa aðferð,“ sagði Roni Gamzu, forstjóri Ichilov-sjúkrahússins, í samtali við The Times of Israel.
Grikkir hafa þegið boð um að taka þátt í áframhaldandi tilraunum með EXO-CD24.
