Héraðsdómur Reykjavíkur sýknaði í gær ríkið af kröfum Barkar Birgissonar um 120 milljóna skaðabætur vegna dvalar hans í gæsluvarðhaldi og á öryggisgangi á Litla Hrauni í 18 mánuði.

Krafa Barkar var sundurliðuð svona:

110.200.000 kr. vegna vistunar á öryggisgangi í 18 mánuði.
800.000 kr. vegna ummæla sem látin voru falla í tengslum við málið.
9.700.000 kr. vegna líkamsleitar sem fram fór í fangelsinu.

Forsaga málsins er sú að í maí 2012 lést Sigurður Hólm Sigurðsson í klefa sínum í fangelsinu að Litla Hrauni. Grunur féll á Börk og Annþór Kristján Karlsson um að hafa orðið honum að bana.

Þeir félagar Börkur og Annþór voru þá úrskurðaði í gæsluvarðhald til þess að halda þeim í einangrun í fangelsinu. Einum degi áður en sá gæsluvarðhaldsúrskurður rann út barst þeim bréf um að þeir skyldu afplána eftirstöðvar refsivistar sinnar á öryggisgangi, þar sem þeir dvöldu í 18 mánuði.

Börkur og Annþór voru síðar sýknaðir af ákæru um að hafa átt þátt í dauða Sigurðar Hólms.

Lögmaður ríkisins hélt því fram við málsmeðferðina að sú ráðstöfun fangelsisyfirvalda að vista þá á öryggisgangi hefði ekki verið hluti af rannsókn á andláti Sigurðar, heldur hefði vistunin komið til vegna þess að aðrir fangar hefðu kvartað yfir auknu ofbeldi í fangelsinu meðan þeir voru þar. Samskonar sögur voru sagðar af lögreglufulltrúum og fangavörðum, sem sögðust hafa þurft að þola hótanir af hálfu Barkar. Réttast var því talið að vista þá á öryggisgangi til þess að senda skilaboð um að slíkt yrði ekki liðið í fangelsinu.

Börkur hélt því fram að vistunin á öryggisgangi hefði verið honum einkar þungbær, hann hefði ekki getað sinnt störfum sínum sem ritari Afstöðu, félags fanga, og að ráðstöfunin væri bersýnilega tengd rannsóknar lögreglu á morði Sigurðar, sem hann reyndist svo saklaus af.

Niðurstaða dómara var þá sú að hegðun Barkar hefði ein og sér réttlætt vistun hans á öryggisgangi á Litla Hrauni, og sýknaði því ríkið af kröfum hans. Þá sagði einnig að líkamsleit sem Börkur var látin gangast undir í tengslum við heimsóknir í fangelsið væru réttmætar. „Telst málefnalegt að mati dómsins að slíkri leit sé beitt í ríkari mæli en ella þegar um er að ræða fanga sem slík ógn er talin stafa af að réttlæti vistun á öryggisdeild.“

Ríkissjóður skal samkvæmt dómnum greiða þóknun lögmanns Barkar, en annar málskostnaður fellur niður.