Valgerður Sigurðardóttir, borgarfulltrúi Sjálfstæðisflokks, segir það vera löngu orðið óásættanlegt að börn sem stunda nám við Fossvogsskóla séu veik af því einu að dvelja í skólanum. „Því miður er það er veruleiki sumra barna sem stunda nám við Fossvogsskóla. Nú er svo komið að foreldrar eru að gefast upp, þeirra eina lausn er að selja eigur sínar og flytja til þess að börn þeirra geti stundað nám í húsnæði sem ekki er heilsuspillandi. Þrátt fyrir það sem Reykjavíkurborg hefur gert þá eru börn enn veik,“ segir Valgerður í pistli sem birtist á Vísi í dag.

„Foreldrar hafa ekkert fengið að vita“

Valgerður segir að hvorki nemendaverndarráð eða heilsugæslan geti leyst málið. „Því vandinn er ekki veik börn heldur húsnæðið,“ segir Valgerður og bendir á að það sé Reykjavíkurborg ein sem getur leyst þann mygluvanda sem er í Fossvogsskóla.

„Á vefsíðu Reykjavíkurborgar segir um skóla- og frístundaráð: „Gætir þess að leikskólar, grunnskólar, frístunda- og félagsmiðstöðvar og frístundaheimili á vegum borgarinnar búi við fullnægjandi húsnæði og að annar aðbúnaður sé fyrir hendi.“ Kennarar og börn búa ekki að fullnægjandi húsnæði í Fossvogsskóla, foreldrar hafa orðið að berjast fyrir því að húsnæðið sé rannsakað á viðunandi hátt, berjast fyrir sjálfsögðum réttindum barna sinna. Það er skýr skylda okkar sem sitjum í skóla- og frístundaráði að bregðast við þegar upp koma mál líkt og í Fossvogsskóla.“

Þá segir Valgerður frá því að í september í fyrra hafi verið gert samkomulag við foreldra um að ráðast í frekari þrif og sýnatökur. „Foreldrar hafa ekkert fengið að vita eftir þær sýnatökur þrátt fyrir óskir um það. Það verður að vera meiri samvinna þegar jafn alvarlegt mál líkt og þetta kemur upp, það er ótækt að foreldrar fái ekki svör og veik börn geta ekki beðið,“ segir hún.

„Orkuveituhúsið er gott dæmi“

Valgerður segir að sem betur fer er hætta vegna myglu tekin alvarlega. „Orkuveituhúsið er gott dæmi um alvarleika þess þegar upp kemur mygla, þar kom upp mygla í húsnæði í eigu dótturfyrirtækis Reykjavíkurborgar og var hluti af húsnæðinu dæmdur ónýtur,“ segir hún en spyr hvers vegna ekki er farið sömu leið þegar mygla finnst í leik- og grunnskólum höfuðborgarinnar.

„Getur verið að hluti af þeim vanda sem er í skólakerfinu, lækkandi einkunnir ásamt fjölgandi greiningum geti verið út af því að húsnæðið sem börnin okkar eru í sé heilsuspillandi? Í það minnsta var betri árangur barna í Fossvogsskóla eftirtektarverður á samræmdu prófum þegar þau voru ekki lengur í gamla húsnæðinu þar sem fundist hafði mygla. Getur verið að mygla eigi stærri þátt í líðan barnanna okkar en við gerum okkur grein fyrir?“