Freyja Egilsdóttir Mogensen, sem var myrt af 51 árs fyrrverabndi sambýlismanni sínum, er ekki fyrsta konan sem fellur fyrir hendi hans. Maðurinn játaði að hafa banað Freyju þegar hann var færður fyrir dómara í morgun þar sem gæsluvarðhaldskrafa lögreglunnar var tekin fyrir. Hann var úrskurðaður í fjögurra vikna gæsluvarðhald.

Maðurinn heitir Flemming Mogensen.

Ekstra Bladet skýrir frá því að  að Fleming hafi myrt tvítuga barnsmóður sína á hrottalegan hátt 23. nóvember 1995. Hann stakk hana þá að minnsta kosti 18 sinnum. Sonur þeirra var þá tveggja ára.

Það morð átti sér stað í íbúð konunnar í Kildegaardsparken í Odder en það er aðeins nokkrum kílómetrum frá húsinu þar sem hann er talinn hafa myrt Freyju. Barnsmóðir Flemmings fannst liggjandi í blóði sínu í stofunni. Stofan bar þess merki að þar hefði verið slegist. Maðurinn var handtekinn sama kvöld á heimili föður síns í útjaðri Árósa.

Hann hafði sagt föður sínum að hann hefði „gert svolítið hryllilegt“. Faðirinn hafði þá samband við lögregluna.

Eftir morðið sótti Flemming son sinn til dagmömmu og fór til Árósa. Þar fann lögreglan morðvopnið, stóran eldhúshníf.

Fyrir dómi sagði hann að hann hefði ekki ætlað að bana konunni en hefði verið æstur vegna foreldrafundar, sem snerist um soninn, og hafi verið fullur örvæntingar. Saksóknari lýsti morðinu sem „hreinni aftöku“.

Flemming Mogensen var þá dæmdur í 10 ára fangelsi en hann játaði morðið á sig eins og hann hefur nú játað að hafa banað Freyju.