Öldungadeild Bandaríkjaþings samþykkti í gær tilnefningu Pete Buttigieg sem samgönguráðherra landsins en Joe Biden, forseti, hafði tilnefnt hann í embættið. 86 samþykktu tilnefninguna en 13 voru á móti. Buttigieg er fyrsti samkynhneigði ráðherrann í Bandaríkjunum, að minnst kosti sá fyrsti sem hefur opinberlega skýrt frá samkynhneigð sinni.

Hann atti kappi við Biden og fleiri um að verða forsetaframbjóðandi í forvali Demókrataflokksins en dró sig fljótlega í hlé og lýsti yfir stuðningi við Biden. Hann hefur verið bæjarstjóri í South Bend í Indiana síðustu ár. „Hann stendur fyrir það besta sem við erum sem þjóð,“ sagði Biden um hann en hann hefur einnig sagt hann vera „föðurlandsvin og góðan við að leysa vandamál“.

Buttigieg er 39 ára og eins og fyrr segir fyrsti yfirlýsti samkynhneigði ráðherrann í Bandaríkjunum. Biden hefur sagt að hann vilji að ríkisstjórn sín endurspegli fjölbreytileika samfélagsins.

Buttigieg skrifaði á Twitter að hann væri „auðmjúkur vegna samþykktar öldungadeildarinnar“ og tilbúinn til að hefja störf.