Hann hefur nú verið ákærður fyrir að hafa myrt Jeanne að yfirlögðu ráði. Hann á ævilangt fangelsi yfir höfði sér.
Lík Jeanne, sem var vændiskona, fannst 13. júní 1993 í sturtuklefanum heima hjá henni í Minneapolis. Henni hafði verið nauðgað og hún stungin til bana. Hún var aðeins í sokkum og enn var skrúfað frá vatninu þegar lögreglan kom á vettvang. Lögreglan lýsti vettvanginum síðar sem „blóðbaði“.
Lögreglan hafði ekki úr mörgum vísbendingum að moða og fljótlega lenti rannsóknin í blindgötu og var hætt. En hún hófst að nýju 2005 þar sem ný tækni hafði vakið vonir um að hægt yrði að finna morðingjann. Nú voru það ríkislögreglan í Minnesota og FBI sem önnuðust rannsóknina.
Um mitt ár 2018 voru lífsýni, sem fundust á vettvangi, send til fyrirtækis sem tekur að sér greiningu þeirra og skráningu fyrir einkaaðila. Út frá þeim var hægt að finna út hverjir eru með erfðaefni sem líkist því sem fannst á morðvettangi. Því næst var unnið út frá því og fóru böndin að beinast að Jerry. FBI byrjaði því að fylgjast með honum í von um að komast yfir lífsýni úr honum án þess að hann áttaði sig á því og hefði tækifæri til að leggja á flótta. Í janúar 2019 var honum fylgt eftir á íshokkíleik þar sem hann fékk sér pylsu og þurrkaði sér síðan um munninn með servíettu sem hann kastaði síðan í ruslið. Þessa servíettu veiddu lögreglumennirnir upp úr ruslinu og hún var send til rannsóknar til að fá staðfestingu á að á henni væri erfðaefni úr Jerry. Svo reyndist vera og skömmu síðar var Jerry handtekinn.
Réttarhöld yfir honum hefjast í apríl en hann neitar sök og sagði fyrir dómi í síðustu viku, þegar málið var þingfest, að hann hafi ekki hugmynd um hvernig erfðaefni úr honum gæti hafa endað á morðvettvanginum. Hann er ekki í gæsluvarðhaldi því hann var látinn laus gegn tryggingu upp á tvær milljónir dollara.
CBS Minnesota segir að frá 1993 hafi Jerry margoft verið dæmdur fyrir ölvun við akstur og ólöglega vopnaeign. Hann hefur einnig verið dæmdur fyrir að reyna að kaupa sér kynlíf en þá gekk hann í gildru lögreglunnar.
