Á miðvikudaginn skrifaði hann undir fjölda tilskipana sem eiga að hafa áhrif til hins betra í baráttunni við loftslagsbreytingarnar og við það tækifæri sagði hann að Bandaríkin verði að taka forystu í málaflokknum.
„Við verðum að vera í forystu á alþjóðavettvangi því eins og John Kerry hefur margoft bent á þá geta Bandaríkin ekki tekist ein á við þessar áskoranir,“ sagði Biden í yfirlýsingu.
Kerry, sem var utanríkisráðherra í stjórn Barack Obama, mun leiða baráttuna gegn loftslagsbreytingum í ríkisstjórn Biden.
Biden hefur gert baráttuna gegn hnattrænni hlýnun að einu mikilvægasta máli ríkisstjórnar sinnar. Hann lagði enn á ný áherslu á þetta á miðvikudaginn þegar hann sagði hnattræna hlýnun ógna tilvist mannkyns en um leið skapi aðgerðir gegn þeim tækifæri fyrir bandarískt efnahagslíf og atvinnulíf.
„Ég tel að við höfum beðið alltof lengi með að takast á við loftslagsmálin. Við getum ekki beðið lengur. Við sjáum það með eigin augum. Við finnum það. Við finnum það á líkama okkar. Nú er kominn tími til aðgerða,“ sagði hann.
Hvíta húsið ætlar því að boða til loftslagsráðstefnu þann 22. apríl næstkomandi. Þar á að ræða hvernig er hægt að styrkja sumar þær ákvarðanir sem hafa verið teknar til að stöðva losun gróðurhúsalofttegunda.
