Donny van de Beek miðjumaður Manchester United fundaði með Ole Gunnar Solskjær, stjóra félagsins í síðustu viku. Rætt var um stöðu hollenska miðjumannsins hjá félaginu.

United borgaði um 40 milljónir punda fyrir Van de Beek síðasta haust, félagið lagði áherslu á að fá miðjumanninn frá Ajax.

The Athletic fjallar um málið en Van de Beek og Solskjær funduðu fyrir leikinn gegn Fulham í miðri síðustu viku, Solskjær lofaði Van de Beek að tækifæri hans kæmu. Samkvæmt The Atheltic er Van de Beek vongóður um að tækifærum hans fjölgi á næstu mánuðum.

Van de Beek var í byrjunarliði United gegn Liverpool í enska bikarnum í gær og átti ágætis spretti í 3-2 sigri liðsins. Hann fór af velli um miðbik síðari hálfleiks.

Solskjær tjáði Van de Beek að hann hefði trú á honum og að útilokað væri að hann yrði seldur eða lánaður í janúar.

Góð spilamennska Paul Pogba og Bruno Fernandes hefur orðið til þess að Van de Beek hefur spilað minna en hann hafði vonast eftir. Hollenski miðjumaðurinn var þó meðvitaður um það að fyrsta tímabil hans hjá United gæti orðið svona.

Félagið tjáði honum að hann yrði í stærra hlutverki á næstu leiktíð en búist er við að Paul Pogba fari frá félaginu næsta sumar.