Frank Lampard verður rekinn úr starfi knattspyrnustjóra Chelsea síðar í dag. Fjöldi virtra blaðamanna á Englandi greinir frá.

Gengi Chelsea síðustu vikur hefur verið slakt og hefur Roman Abramovich, eigandi Chelsea tekið ákvörðun um að reka Lampard úr starfi.

Chelsea situr í níunda sæti ensku úrvalsdeildarinnar, ellefu stigum á eftir toppliði Manchester United.

Roman Abramovich lét Lampard fá 200 milljónir punda í leikmannakaup í sumar en árangurinn fylgir ekki með, eigandi Chelsea er ekki þekktur fyrir mikla þolinmæði gagnvart stjórum sínum.

Samkvæmt The Athletic eru Chelsea byrjaðir að skoða arftaka Lampard og eru sagðir horfa til Þýskalands.

Thomas Tuchel fyrrum þjálfari PSG er sagður á blaði hjá Chelsea og sömu sögu má segja um Julien Nagelsmann þjálfara RB Leipzig. Þá er Ralf Rangnick fyrrum þjálfari Leipzig einnig sagður á blaði Chelsea. Með því að ráða inn þýskan þjálfara þá telur Chelsea sig geta náð því besta fram úr Timo Werner og Kai Havertz.

Lampard sem átti magnaðan feril sem leikmaður hjá Chelsea, var á sínu öðru ári í starfi en þarf nú að taka poka sinn.