Bandaríska dómsmálaráðuneytið hefur ákært Garret Miller, frá Texas, fyrir að hafa ætlað að myrða Alexandria Ocasio–Cortez, þingkonu demókrata í fulltrúadeild Bandaríkjaþing, í árásinni sem var gerð á þinghúsið í Washington 6. janúar. Hann er einnig ákærður fyrir að hafa tekið þátt í árásinni.

Samkvæmt dómsskjölum fór saksóknari fram á það við dómara á föstudaginn að Miller verði i gæsluvarðhaldi þar til málið verður tekið fyrir. Í þeim kemur einnig fram að Miller hafi birt margar færslur á samfélagsmiðlum, áður en ráðist var á þinghúsið, þar sem hann sagðist ætla til Washington D.C  og að þar ætlaði hann að drepa Ocasio–Cortez og lögreglumann. Saksóknarar segja að hann hafi einnig birt fleiri hótanir á meðan á árásinni stóð. Á Twitter skrifaði hann meðal annars: „við tökum vopn með næst“ undir myndband sem sýndi árásarmenn yfirgefa þinghúsið.

Ocasio–Cortez birti myndband á Instagram 12. janúar þar sem hún sagðist hafa óttast að einhverjir þingmenn myndu skýra árásarmönnum frá staðsetningu hennar á meðan árásin á þinghúsið stóð yfir og að henni yrði rænt eða hlyti enn verri örlög. Hún sagðist einnig ekki hafa verið viss um hvort hún myndi lifa þennan dag af. Hún er mjög óvinsæl meðal margra Repúblikana sem telja hana allt of vinstri sinnaða.