Rangers er með 23 stiga forskot í skosku úrvalsdeildinni eftir 5-0 sigur á Ross County í dag. Fátt virðist geta komið í veg fyrir að liðið verði skoskur meistari.

Ross County var engin fyrirstaða fyrir lærisveina Steven Gerrard í dag. Staðan í hálfleik var 3-0 fyrir Rangers.

Mörk frá Ryan Jack og Connor Goldson í seinni hálfleik gulltryggðu síðan 5-0 sigur liðsins.

Rangers situr í 1. sæti deildarinnar með 69 stig eftir 25 leiki. Liðið á enn eftir að tapa leik og er með mikið forskot í deildinni.

Lærisveinar Gerrard hafa unnið 22 leiki á tímabilinu og gert 3 jafntefli, skorað 65 mörk og aðeins fengið á sig 7 mörk.

„Við erum á frábærum stað í augnablikinu en nú einblínum við bara á næsta leik sem er á miðvikudaginn,“ sagði Steven Gerrard í viðtali eftir leik en hann var að stýra sínum 150 leik sem knattspyrnustjóri Rangers.

Rangers hefur unnið 98 af þeim 150 leikjum sem liðið hefur spilað undir stjórn Gerrard, hann er með 65.10% sigurhlutfall sem knattspyrnustjóri liðsins og stefnir hraðbyri í átt að sínum fyrsta deildarmeistaratitli sem knattspyrnustjóri.