Phil Neville, var á dögunum ráðinn knattspyrnustjóri bandaríska liðsins Inter Miami, liðið er í eigu David Beckham en hann og Neville eru miklir mátar og fyrrverandi liðsfélagar hjá Manchester United og enska landsliðinu.

Neville verður einungis annar knattspyrnustjóri Inter Miami í sögu félagsins sem var stofnað árið 2018. Neville, þjálfaði áður enska kvennalandsliðið og hefur mikla reynslu frá sínum árum sem leikmaður.

David Beckham, eigandi liðsins, sat fyrir svörum á blaðamannafundi á dögunum og vildi gera öllum það ljóst að Neville, hafi ekki bara verið ráðinn af því að hann sé góðkunningi eigandans.

„Ég hef þekkt hann síðan ég var 15-16 ára gamall og ég veit hvernig hann er, bæði sem leikmaður og manneskja. Hann leggur hart að sér, ég hef aldrei séð neinn leggja eins hart að sér eins og Phil og bróðir hans Gary,“ sagði David Beckham á blaðamannafundi.

Beckham segist átta sig á því að það sé til fólk sem segi að Neville hafi bara verið ráðinn vegna þess að hann sé vinur eiganda liðsins.

„Þetta hefur ekkert með það að gera að hann sé vinur minn. Ég er eigandi félagsins með Jorge og ég ræð ekki einstaklinga út frá því hvort þeir séu vinir mínir, heldur ræð ég hæfustu einstaklingana,“ sagði ákveðinn David Beckham.