Stuðningur við að ríkið greiði listamannalaun hefur aukist á milli ára – Viðhorf mjög breytilegt eftir stuðningi við stjórnmálaflokka
Yfir helmingur Íslendinga er fylgjandi því að ríkið greiði út listamannalaun. Þetta kemur fram í nýrri könnun MMR um viðhorf fólks til listamannalauna frá ríkinu.
Þar sögðust 53 prósent svarenda vera fylgjandi listamannalaunum og 46 prósent á móti.
Könnunin var framkvæmd dagana 12. janúar til 20. janúar 2016 og var heildarfjöldi svarenda 922 einstaklingar, 18 ára og eldri.
Spurt var: „Ertu fylgjandi eða andvíg(ur) því að ríkið greiði listamannalaun?“ Svarmöguleikar voru: „Mjög fylgjandi“, „Frekar fylgjandi“, „Frekar andvíg(ur)“ og „Mjög andvíg(ur)“. Samtals tóku 86,2 prósent afstöðu spurningarinnar.
Samkvæmt MMR hefur hlutfall þeirra sem eru fylgjandi aukist um yfir 7 prósent síðan í febrúar 2013 og um yfir 14 prósent síðan í mars 2010.
Ekki var mikill munur á viðhorfi svarenda eftir aldri fyrir utan yngsta svarendahópinn þar sem töluvert fleiri sögðust vera fylgjandi því að ríkið greiði listamannalaun.
Sjá má að viðhorf til listamannalauna eru mjög breytileg eftir stuðningi við stjórnmálaflokka. Sem dæmi eru 77 prósent þeirra sem styðja Framsókn og 68 prósent þeirra sem styðja Sjálfstæðisflokkinn andvíg listamannalaunum, en á hinn bóginn eru 80 prósent þeirra sem styðja Samfylkinguna eða Vinstri græna fylgjandi því að ríkið greiði út listamannalaun.
Hér má sjá nánar um niðurstöðu könnunarinnar.