Í lok ársins 2020 voru landsmenn rúmlega 51,8 milljónir og hafði fækkað um 20.838 frá 2019.
Fólki fjölgaði í landinu árlega síðasta áratuginn en þó hafði hægt mjög á fjölguninni. 2010 var hún 1,49% en var komin niður í 0,05% 2019. Yonhap skýrir frá þessu.
Þróunin í Suður-Kóreu er sú sama og hefur lengi verið í Japan. Þetta kallar á aðgerðir yfirvalda að sögn innanríkisráðherra landsins. Ríkisstjórnin kynnti nýlega aðgerðir til að hvetja fólk til að eignast fleiri börn. Þar á meðal er eingreiðsla til barnshafandi kvenna og mánaðarlegar barnabætur þar til börnin ná 12 ára aldri. Gagnrýnendur segja að þetta sé ekki nóg því það fylgi því mikill kostnaður að eiga mörg börn, til dæmis menntunarkostnaður og húsnæðiskostnaður.
Um leið og heildarmannfjöldinn dregst saman fjölgar fólki 60 ára og eldra en það er nú 24% af þjóðinni. Þróunin á sér stað bæði í borgum og bæjum og dreifbýli að sögn Yonhap.
